Copie d'un contrat de vente d'une parcelle de 1643 (entre Bertrand de Lissalde et Arnaud Olheguy )

Saichent tous que ceJourdhuy quatrie du mois d'octobre mil six cens quarante tris apres midy En la parroisse de guissen Et maison noble de Labadiee pardevant nous nottaires Royaux soubz signes Et tesmoings baz nommés a Esté En sa personne arnault d'olheguy dit heguychipy Laboureur habitant En La parroissce de bardos Lequel de sa franche Et agreable volonté faisant tant pour Luy que pour Jeanne de heguychipy sa mere Et se faisant fort pour elle a vendeu Et allienné Ceddé & transporté par Ces presens a noble Bertrand de lissalde Escuyer sieur du saudan & datissan habitant En La parroisse d'urt present Et Aceptant scavoir Est une Journee Et demy de terre prairie scituéé au Lieu appellé Stégrand juridiction dudit guissen Et piesse de Ladicte maison noble de Labadiee ont tout Les nom raison Et action quilz ont En Icelle par Le Contrat du second de Juillet mil six cens trente trois Retenu par moy dit de Casenave que Confronte de tous Boutz & Costés a terre de laditte maison de Labadiee Et autrement ainsy que Entre ses plus Emples Et Legitimes Confrontaons & la presente Cession a Este faicte par Le dict dolheguy En faveur dudict sieur de Lissalde pour Le pris & somme de Cent quatorze Livres pour Laquelle Il La tenoit Et trente deuz solz pour Le salaire dIceluy oblige que Ledit sieur de Lisalde a Le tout Compté Et nombré En pieces de vingt un solz de france Et par Ledict dolheguy prins & Retire a soy dont sest Contente Et En a acquicte Et acquicte Ledit sieur de Lisalde En faveur duquel sest desmis de ladicte terre Len a saisy vesteu Et mis En possesion par Latouchement de La Cedde des presens quil Luy a mis En main En signe de Ce Consantant quil En jouisse Et face Les fruitz siens Et quil En prenne La realle pocession par justice ou autres Comme bon Luy semblera Luy present ou absant Et sans Luy appeller Le constituant procureur En propre Cause auquel sieur de Lisalde Ledit dolheguy a baille Et Remis En main Le Contrat dachapt dessus datté pour Estre subrogé En son Lieu droit plas Et Ipoteque, Comme Il subroge par Les presens promettant Luy tenir Bonne ceste Cession envers Et Contre tous a peyne de tous despens domages & Intretz soubz obligaon Et Ipoteque de ses personnes & biens mubles & Inmubles presens Et advenir quil a soubzmis a toutes Rigueurs de Justice a quy La Connoissance En appartiendra a renonce a toutes Renontiations Exceptions Et moyens a Ce dessus prejudiciables Et ainsy La promis Et Jure tenir Es presences de maistres arnaut du Clercq pretre Et Curé Et saubat de Labayre bayle dudict guissen tesmoings a Ce appeles & signes a La Cedde aveq Ledict sieur de Lisalde Et non Ledict dolheguy pour ne scavoir de Ce faire somme par nous Ainsy signés duclerq & de Casenave Nores Royaux

Extraicte Vidimée & Collaonnée a este la present coppie a sa coppie tiree de son original par Nous Notaires Royaux soubzsignés sans y avoir Rien adiousté Ny diminue Ce Requerant Noble Bertrand de Labadie Escuier, sr dud. lieu au pouvoir duquel Le tout est demuré a bayonne le cinquiee juin 1664



4e octe 1643 duclerc & casenave notes
Raschapt avec quittance dune journée et demy de terre a esté grand, de arnault dolheguy tant por luy que por jeanne de heguychipy sa mere bardos por 115 lt 12 s