Expédition du testament d'Anne Bernatas (1759)

Par Devant moy nore Royal Et temoins bas nommés a Eté presente anne de Bernatas du lieu dasson laquelle possedant une santé asses Raisonable par la grace du seigneur faisant neamoins Reflection a la certitude de la mort Et Incertitude de lheure Et momant dicelle a voulu avant Den Etre surprise faire son testament cassant annullant Et Revoquant tous autres testamens codicilles Donations Et autres actes de Disposition a cause de mort, quelle auroit peu faire cy devant soit de Bouche ou par Escrit voulant que le present seul soit Executé selon sa forme Et teneur, laquelle apres avoir fait le signé de la sainte croix Recommandé son ame a Dieu le pere qui la crée a Dieu le fils qui la Racheptee, a dieu st Esprit qui la Illuminée priant cette tres ste Et adorable Trinite de luy faire pais Misericorde Remission de ses fautes Et peches, Et de placer son ame lors quil luy plairra de la separer de son corps dans le Royaume celeste de paradis parmy les bienheureus Et quapres sa mort son dit corps soit Ensevely dans leglise parroissialle st Martin du present lieu ou cemitiere dicelle Et que les honneurs funebres luy soit faites avec la Modestie convenable aux depens de son bien Et aux soins de jean de Nerios son mary, Premierement veut Et Entend laditte Testatrisse quinmediatement apres sa mort Il soit celebré pour le Repos de son ame, le nombre de cent messes par les sieurs curé Et vicaire qui se trouveront au present lieu dasson lors du Deces delle ditte testatrisse la Retribution desquelles seront payées aux Pretres qui les celebreront a Raison de Dix sols chascune, Item a dit laditte Testatrisse quelle a Eté jointe En mariage avec ledit jean De nerios du present lieu dasson duquel Il a Eté procré six Enfans scavoir cincq garsons Et une fille qui sont tous En vie la fille mariee a Bernadou dudit present lieu dasson a laquelle la dot a Eté payée, les garsons appellés le premier jean le second Barthelemy le troisieme Bernard le quatrieme jean De Meme que le cinquieme auxquels quatre Enfans ses fils cadets laditte testatrisse, veut Et Entend que leurs droits legitimes maternels soint payés, a connoissance de quatre de leurs plus proches parens apres la mort de laditte testatrisse; voulant neamoins que lors du payement des dits droits legitimes ses dits quatre Enfans colloquent le montant En main ou piece solvable chascun les concernant pour Repondre du Retour En faveur de son heritier Bas a nommer, Item a dit laditte Testatrisse quelle a tout lieu detre satisfaite de la conduitte dudit de Nerios son mary avec lequel Elle a toujours vecu En bonne pais Et union Et afin de luy donner des marques de Reconnoissance des bons et agreables services quelle a Receu de luy soit En santé soit En maladie laditte Testatrisse lexte laisse Et legue audit de nerios son dit mary la quatrieme partie de tous Et chascuns ses Biens presens et advenir pour En faire et disposer a sa volonté laquelle quarte laditte testatrisse Evalue a la somme de cincq cens livres sans que par Raport a laditte Evaluation Il puisse Estre Rien change au plus ou le moins de laditte quarte, Et Dautant que le fondement dun bon et valable testament Est linstitution hereditaire laditte testatrisse a Institué Et Institue pour son heritier universel de tous Et chascuns ses biens presens Et advenir outre Et au dela de ceux par Elle deja legués jean de nerios dit Bernatas son fils aisné a la charge par luy dexecuter le contenu au present testament lequel a Eté leu Et Releu a laditte testatrisse Et par Elle Bien Entendu a Declaré quiceluy contient sa pure libre et derniere volonté a laquelle Elle a persisté, fait et passé audit lieu dasson Et dans mon Estude le dix sept avril mil sept cens cinquante neuf presens et temoins mes francois puyo pierre Peré pierre MIchel fils jean de caubet habitans dud. lieu dasson Et moy jean de Lescun nore Royal du Meme lieu Et dependances qui le present ay Retenu Et signé avec les dits temoins non laditte de Bernatas Testatrisse pour ne savoir a ce quelle a Declaré apres Interpellation signes sur lorginal Puyo pnt, Peré pnt, Caubet pnt, Michel fils pnt, Lescun nore Royal, conle Et Insinué a nay le 14 novembre 1760 Receu vingt six livres dix sept sols six deniers signé Daleman duquel original moyd. nore ay fait la presente grosse pour led. de nerios dit Bernatas mary et signee


Recu pr le papier et celuy de loriginal six sols Retention et droit de greffe six livres par les mains dud. de nerios



Du 17 avril 1759
Grosse de Testament de anne de Bernatas du lieu dasson