Testament de Susanne de Guilhemto

Sçachent tous Presens Et advenir que Lan Mille six cens octante Et le Neufiesme de mars par devant moy nore soubz signé presens les tesmoings bas nommés dans la maison de lucat du present lieu de laseube a Esté pnte damle Susanne de Guilhemto doloron Veuve a feu noble Bernard de Badet En son Vivant sieur de Casterot de monneing Et avocat En la cour; laqu'elle considerant qu'il ny a chose plus assuréé dans ce monde que la mort, ny rien de plus Incertain que lheure d'Icelle, Estant toutes fois par la Grace de dieu sainne de son corps Et Esprit, Et aussy En bon sens, memoire, Et Entendement a voleu faire le pnt testement, Et ma requis a moid. nore de le luy retenir, mettant En Icelluy toute fermetté, Efficasse, Et valeur, Et affin que cella soit Elle casse, anulle Et revocque par le pnt testement tous autres precedans testemens, codiciles, donnations, a cause de mort, ou autres dernieres Volontés, Et Clauses desroguatoires quy pourroint Estre En Iceux contenües, Et qu'elle pourroit avoir fait soit de bouche, ou par Escript dequoy Elle a declaré qu'elle ne se souvient point, soit pour la longeur du temps, ou defaut de sa memoire, Et Elle veut Et Entend que le pnt testement sorte a son plain Et Entier Effect en tous poins come Estant en Icelluy Exprimée sa derniere volonté, Premierement come une bonne & fidelle Chrestienne lad. damle testatrisse recomande son ame a dieu son pere le suppliant de luy pardonner ses fautes Et pechés Et de luy faire grace, Et mesirecorde pour la mort, Et passion que Jésus christ son sauveur a souffert pour Elle, Et que pour les merites dIcelluy Il luy plaise de recevoir son ame En son paradis lors quil luy plaira de la séparer de son corps, Item lad. damle testatrisse a dit Et declaré qu'elle a Este mariée avec led. feu sieur de Badet Et que de leur mariage Ils ont procré par la grace de dieu plusieurs Enfans masles Et femelles desqu'els Il n'en reste de present En vie que quattre filles, sçavoir la premiere appellée anne de badet mariée avec noble Estienne de laborde argant dorthes avocat En la cour, la seconde appelléé marie de badet mariéé au sieur Eusebe de lucat dud. pnt lieu de laseube sieur de la terre noble de dupleix de Carresse, la troisiesme appellée Isabeau de badet mariée au feu sieur de borderes doloron, et sa Veuve de present, Et la quattriesme appelléé gratie de badet mariée a noble daniel de muneing sieur de Castetnau de maslacq capitaine, Item lad. testatrisse a dit Et declaré que led. feu sr son mary Et Elle ont marié cy devant noble Jean de badet casterot avocat En la cour leur fils aisné, decedé avant led. sr de badet son pere, avec damle Isabeau de lasalle doloron Et que de ce mariage Il a Esté procré par la grace de dieu divers Enfans des qu'els Il nen y a de present En vie que trois filles, la premiere nommée anne de badet, la seconde Isabeau de badet, Et la troisiesme marie de badet, Item lad. damle testatrisse a dit & declaré que led. sieur de badet son mary a disposé En sa faveur par son dernier testement du 28e mars 1679 Entre autres choses de la quarte de tous ses biens Et causes, Et qu'ayant Elle droit a raison de ce de disposér de ceste quarte, Et dailheurs aussy Entre autres choses de la quarte de tous ses propres biens Et Causes non'obstant linstituon hereditaire par Elle faitté En faveur de sond. fils, Et de sond. mariage avec lad. damle de lasalle, lad. damle testatrisse a dit Et declaré qu'elle laisse & legue a sesd. qu'attre filles, anne, marie, Isabeau, Et gratie de badet, la moytié desd. deux quartes a partager Entre Elles Esguallement, Et Elle veut Et Entend qu'elles En puissent disposér come Elles verront bon Estre; Et ou neanmoins avant son deces pas aucune de sesd. filles viendroit a desceder Elle veut En ce cas que sa part de lad. moytié desd. deux quartes qu'elle luy legüe cy dessus revienne aus Enfans de sa fille quy pourroint survivre a lad. testatrisse a partager Entr'eux Esguallement; Et cy Encore avant le deces de lad. testatrisse aucune de sesd. filles venoit à mourir sans postherité, Elle veut Et Entend en ce cas que sa part de lad. moytié desd. deux quartes qu'elle luy laisse soit partagée Esguallement Entre sesd. soeürs, Et leurs Enfans quy pourroint survivre lad. testatrisse; Item Lad. damle testatrisse a dit & declaré que quand a lautre moitié desd. deux quartes, Et autres ses biens acquetz qu'elle les laisse, Et legue tant aus Enfans de sesd. filhes, qu'ausd. Isabeau, Et marie de badet filhes dud. feu sr de badet son fils, tres tous petis Enfans de lad. testatrisse quy pourroint la survivre a partagér Entr'eux Esguallement, Item lad. damle testatrisse a dit Et declaré qu'elle laisse & legue aud. sr de laborde son Gendre la quattriesmé partie des livres quy Composoit la bitblotecque dud. feu sr de badet son mary, Item lad. damle testatrisse a dit & declaré qu'elle laisse & legue a lad. anne de badet sa filhe feme aud. sieur de laborde deux robes noires lune garnié de dantelles, Et lautre de drap d'espaigne servant a porter deuilh; come aussy deux cottilhons lun de sattin noir & lautre de drap de holande, quy sont les plus beaus habitz de lad. testatrisse; Item lad. damle testatrisse a dit Et declaré qu'elle laisse & legue au concistoire des Gens de la religion pretendüe refformée d'oloron la some de Cent livres tournoises pour Estre par Eux Emploÿée a lentretien du ministaire, Item lad. testatrisse a dit & declaré qu'elle laisse & legue a chasque servante qu'elle pourra avoir a guages a lheure de sa mort, & quy lacistera a la maladie dont Elle descedera la somme de trente livres tournoises, Et Elle a dit Et declaré qu'elle veut, Et Entend que les quattre derniers leguatz precedans soint prins par prealable sur tous les biens dont Elle dispose, Et a droit de disposer; Item lad. damle testatrisse a dit Et declaré qu'au surplus de tous ses autres biens, Et causes Elle fait, nome, Et Institüe pour son heritiere lad. anne de badet sa petite fille En acomplissant, Et Executant son pnt testement, volant Et Entendant neanmoins que sur ce surplus desd. biens & Causes sesd. deux autres soeürs Isabeau, Et marie de badet, petites filles de lad. testatrisse soint legitimées raisonnablement; Et lad. testatrisse substitüe a lad. anne son heritiere Et petite fille au cas qu'elle vienne a desceder sans Enfans, Et postherité legitime, ou Iceux venant a deffaillir lad. Isabeau de badet sa petite filhe, Et a Elle En pareil cas lad. marie de badet sa petite fille, Et a Elle En pareilh cas lad. anne de badet sa fille aisnée, Et ses Enfans, Et à Eux En pareilh Cas lad. marie de badet sa fille Et ses Enfans, Et a Eux En pareil cas lad. Isabeau de badet sa filhe & ses Enfans, Et à Eux En pareilh cas lad. gratie de badet sa fille, le tout degré par degré; Item lad. damle testatrisse a dit Et declaré que sa derniére volonté se trouve Couchée cy dessus dans le pnt testement qu'elle veut, Et Entend sortir son plain Et Entier Effect quoy que par cy apres Il arrivat qu'elle en fit qu'elque, ou qu'elques autres testemens, Codiciles, donnations a cause de mort, ou autres dernieres volontés lesqu'elles lad. testatrisse anulle, & casse par le pnt a moins que par Expres dans celle, ou celles, qu'elle pourroit faire pour autantiques qu'elles feussent les motz suivans cy trouvent Expressement, dieu maciste soit En la vie, soit En la mort, Et Icelle Estant la derniere volonté de lad. testatrisse Elle a fait & arresté le pnt testement qu'elle veut Et Entend sortir son plain & Entier Effect soit come testement, codicille, donnation a cause de mort, ou autre derniere volonté en la meilhure forme que faire se pourra prealable lecture a Elle faitté du tout fait aud. lieu de Laseube, & maison susd. de lucat led. Jour, & an que dessus, Es presences de Jean de mousis arnaud de barocq du mesme lieu Jean de bernadon de pont de laruns En Ossau Et moy Jean Jacques de labegorre nore publicq dud. lieu de laseube quy le pnt ay retenu & signé avec lad. damle testatrisse & tesmoings

s. de guilhento testatrice, barocq pnt, Mousis pnt, Bernadou pnt
Labegorre nore


du 9. mars 1680
Testement de damle susanne de guilhemto doloron veuve au feu sr de badet sr de Casterot ada en la cour